مشحوت فضة والبيصي
دي اسماء حقيقية والله مش تأليف
وأنا من ناحيتي مش ضد ان حد يبقى اسمه مشحوت أو بطوط .. ولا ضد ان حد يبقى اسمه البيصي
هما حرين .. احنا مالنا .. مش هنعدل على اسماء الناس
مشحوت والبيصي قصة حقيقية في مصر
مشحوت مدرس والبيصي خريج معهد المساحة وبيشتغل في جمعية زراعية على ما اذكر والدكروري (شيء ما) بيشتغل في شركة الكهربا
مشحوت مؤمن ان الانسان مش هيموت لو ما أكلش بانيه وأن أمن بلده أهم
(ده بوست منتشر على بعض الصفحات ومشحوت حس ان البوست ده بيمثله, فشير البوست بكل تفاني وتكاد أنغام موسيقى (يا حبيبتشي يا ماسر) تتصاعد من صفحته وتحس ان حسابه قرب يتحرق من حرارة الوطنية)
وأنا برضه مش ضد ان الانسان يقتصد في البانيه ولا ضد ان الانسان يبقى زبون دائم على الصفحات إياها ولا ضد ان الانسان يسمع اغنية (يا حبيبتشي يا ماسر)
ولا ضد ان مدرس رياضيات يبقى مشترك على صفحة (جيش ماسر خير الأجناد)
مشحوت مش بيسيب مناسبة الا ويستعمل كلمة “خرفان” ويشتم تركيا وقطر
وأنا مش ضد ان المواطن يبقى “أبيح” أحياناً
والناس من وقت للتاني لازم تفك عن نفسها .. برضه مش دي المشكلة
ولا ضد ان الإنسان يبقى واخد موقف معين من بلد بعينها (يمكن مش بيحب قطر وتركيا دمها تقيل على قلبه) ده برضه حقه مش هنتدخل في أذواق الناس
سبب تنقيبي لأول مرة في حساب الأخ مشحوت والأخ البيصي ان الاتنين كتبوا تعليقات سباب على بوست كتبته على الصفحة من فترة
طبعا انهالت الفاظ السباب (+99) والاتهامات لشخصي الضعيف اني “بقبض من قطر وتركيا وأمريكا” واني عضوة في جماعة (مريخيون متآمرون على ماسر) وبشتغل مع مخابرات سريلانكا واني جزء من مؤامرة ضخمة لتخريب ماسر وهدم أمنها
الأخ مشحوت ورفاقه الدكروري والبيصي بيؤمنوا إيمان راسخ عن عقيدة لا تزعزع, اني بقضي وقت فراغي بعد تحضير العشا للعيال في التآمر على ماسر
الأخوة مشحوت والبيصي والدكروري اتهموني (كما جرت العادة) اني خاينة وعميلة وبقبض بالدولار !!
(واحدة اتجوزت وعاشت في امريكا وبتشتغل في امريكا, هتتعامل بأي عملة ؟ أكيد مش بشتري حاجات البيت بالجنيه مثلاً ..
عملة أمريكا اللي انا عايشة فيها يا أخ مشحوت هي الدولار .. وعلى رأي الفيلم يا أخ مشحوت .. واحد مصري هيشجع نيجيريا ؟)
طيب ايه المشكلة مع الأخ مشحوت والسيد البيصي ولا الأخ دكروري موظف شركة الكهربا اللي علق على منشور من كام يوم ؟
المشكلة الحقيقية ان الأخ مشحوت هو نموذج مثالي لحالة المس الإعلامي
مشحوت مواطن ممسوس اعلاميا
عقله بيتكون من ورق جرايد
عايش في عالم وهمي بناه الإعلام
عقل مليان بانتصارات وهمية وزعامات وهمية وتاريخ وهمي
مشحوت نموذج للمواطن اللي عقله تحول إلى بلاعة مسدودة بتتجمع فيها كل أنواع النفايات والفضلات
بيجري ورا كل كذبة ويصدقها
الحاجة الوحيدة الحقيقية في حياته هي الفشل والغلاء والمعاناة اليومية والجري ورا لقمة العيش اللي العسكر بيسرقوها من جيبه وجيوب غيره
مواطن مطحون زيه زي ملايين المصريين اللي العسكر نهبوهم وسرقوهم وامرضوهم
جوة عقل مشحوت, هتلاقي كرة قدم وأقوال مأثورة لأحمد موسى ونظريات اقتصادية للشاويش عجوة قائد الإنقلاب ومشهد من فيلم لالهام شاهين
مشحوت نموذج يجب أن يدرس عن نتايج عمل الإعلام في العقل
عقل منسوف … جمجمة اتخلعت من مكانها واتحط مكانها بلاعة باستك بتقدر تستوعب كل أكاذيب العسكر من أول أسر قائد الاسطول السادس لحد ماسر هتبقى قد الدنيا
مشحوت هو نموذج بينتجه خط انتاج الإعلام في مصر بكثرة وفيه منه موديلات
فيه منه الصحفي وفيه منه الكاتب وفيه منه الإعلامي وفيه منه السياسي
مشحوت نموذج لأزمة العقل المصري اللي انتجها إعلام العسكر الضال
الإعلام فيروس ضرب عقول قطاع من المصريين وصنع منهم فريق بيشوف الحق باطل والباطل حق
رجعهم لعصر الجاهلية .. رجعهم لعصر فرعون .. بيشوفوا القتل والمدابح والفساد والسرقة وهما نفسهم بيتسرقوا وبرضه بيطبلوا لأي فرعون
بيشوف عبد الناصر زعيم وبيشوف السادات قائد وبيشوف المخلوع استقرار وبيشوف عجوة منقذ
وبيطبل لأي فرعون متخابر فاسد حرامي
وبيكره الرئيس اللي كان عاوز يخلي له قيمة وعاوزه ينتج غذاءه وسلاحه ودواءه
مشحوت نموذج للمواطن المصري والمواطن العربي
مشحوت شخص مجني عليه لكنه هو كمان جنى على نفسه
زيه زي الدكروري والبيصي
كلهم مجني عليهم وكلهم جنوا على نفسهم ويتحملوا وزر اللي وصلوا له
كان ممكن مشحوت ينقذ نفسه اذا طبق الآية
بسم الله الرحمن الرحيم
(يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ)
صدق الله العظيم
