زي النهاردة
ليه اللي بقوله مزعج جدا للبعض ؟
لأن البعض ببساطة نفسه يرجع لحياته القديمة
يهتف فيسقط الانقلاب العسكري ويروح بيتهم ومفيش مانع يقول على نفسه ثوري
مشهد في فيلم زي النهاردة بيلخص الحالة دي
الممثلة بتحلم ان اخوها مدمن المخدرات لابس نضيف وبيبتسم ورايح الجامعة
بتحاول تطلع من الكابوس
مش قادرة تصدق ان اخوها شمام وحرامي
عقلها الباطن بيحاول يريحها نفسياً .. بينها وبين نفسها بتتمنى ان كل اللي هي شايفاه ده مش حقيقي
البعض كمان بيتمنى ان الكابوس اللي هو عايشه يطلع مش حقيقي
يفتح عينه يلاقي مظاهرات 30 سونيا خلصت
والجيش طلع بيان بيقول فيه ان تغيير الرئيس له قنوات معروفة وانه بيدعم اختيار الشعب في أن يكمل الرئيس مدته وبيدعو الكل للعمل من أجل استقرار مصر .. الخ
البعض مش قادر يصدق ان الجيش قتل الناس في رابعة وتآمر مع الموساد والبنتاجون عشان يعمل انقلاب على الرئيس المنتخب
البعض لسة مش مصدق ان الجيش اللي هو بيعتبره حامي الدولة وفاكره انتصر في 73 هو اللي بيهجر رفح وبيضرب بيوت أهل سينا بالطيران والمدافع والدبابات وبيفتح النار على اطفال المدارس وفي الكماين
مش قادرين يصدقوا ان الجيش ده بيبعت سلاح وطيارين للمجرم بشار
وسلاح للمجرم حفتر
مش قادرين يصدقوا ان الجيش ده بيعمل لحساب اعداء الاسلام
ما تكبريش الموضوع يا آيات .. اعداء الإسلام حتة واحدة ؟؟ !!
البعض دول بالنسبة لهم الموضوع انقلاب قامت بيه قيادات الجيش المصرائيلي !!
ايوة فيه ناس لسة بتفكر بالطريقة دي حتى الآن
ومش قادرين يشوفوا الصورة كاملة وبيساهم في الطريقة دي التكوين العلماني لعقولهم
(هما مش عارفين ان جزء من عقولهم تم تكوينه بصورة علمانية بتقوم على العلم والدولة والحدود .. الخ)
البعض لسة عاوز يرجع لحياته القديمة ومش متصور ان الموضوع كبير كدة
عاوز يتضايق من ارتفاع اسعار السكر .. مش عاوز يشوف ان اللي بيحصل اعادة تقسيم للمنطقة كلها
عاوز يهتم بسعر الدولار والترقية وتجهيز شقته ..
عاوزة تتكلم في فستان مذيعة وفي جوازة ممثلة
عاوزين يعرفوا يستمروا في ترديد الكلام القديم .. الحدود – عودة الجيش لثكناته – الانتخابات
مش قادرة ومش قادر يستوعبوا ان حياتهم اتغيرت
مش عاوزين يشوفوا ن كل ده وقع واتغير ومش راجع تاني
مش عاوزين يشوفوا ده بيدوروا وشهم بعيد عن المشهد
حالة أقرب لحالة الزوجة اللي لسة عروسة وفوجئت ان جوزها مدمن مخدرات وبيضربها كل يوم وبيخونها يومياً ومن عبدة الشيطان
تصور زوجة متزوجة حديثاً تكتشف ان جوزها من عبدة الشيطان
حالة انكار مصاب بيها البعض
البعض رافض يشوف الواقع على حقيقته لكن الواقع مش على مزاجنا
بعض الناس مصرة تسمي البطيخة تفاحة
الناس تعدي من جنبه وتقول عليها بطيخة وهو مصر يشوفها تفاحة
ناس بسيطة مسالمة لقوا نفسهم فجأة في مواجهة واقع متوحش
جزء من رد الفعل ده سببه ان البعض اتربى على ثوابت مش قادر يشوف غيرها (الدولة – المؤسسات – خير اجناد الأرض – الحدود .. الخ)
فجأة بيكتشف ان كل ده سراب ووهم لكنه مصر ما يشوفش الصورة
الصنم اللي كان بيعبده من غير ما يشعر طلع مجرد صنم
وهو مطالب دلوقتي انه يحارب كل اللي اتربى عليه
معركة مع عقله
جزء تاني من السبب هو الإعلام
قوة الوهم اللي بتتحكم في الناس
هو مش قادر يشوف انه مخدوع
البعض مش قادر يشوف ده
حتى لما تجيب له وثائق
بالنسبة للبعض اللي بقوله مزعج بيصحيهم من النوم
مؤرق بينغص عليه حياته
لكن الواقع مش هيتغير لمجرد انك مصر تشوفه على هواك
البطيخة هتفضل بطيخة حتى لو قررت تسميها تفاحة
أنا اخترت الطريق الصعب
طريق كشف الأوراق كلها للناس
مش هقولك دولة وحدود وجيش وثكنات
مش هضحك عليك بكلام انا عارفة انه كلام فارغ
انت مش هترجع لحياتك القديمة خلاص حتى لو انت عاوز ده
الواقع حواليك بيتغير سواء ده عجبك او ما عجبكش
